دنیا کا سب سے معمر کتا، کتنے سال کا ہوگیا؟
راولپنڈی (نیوز ڈیسک )گنیز ورلڈ ریکارڈ کے مطابق دنیا کے سب سے معمر ترین کتے نے حال ہی میں اپنی 31ویں سالگرہ منائی ہے ۔ بوبی، ایک خالص نسل کے Rafeiro do Alentejo، جو پرتگالی کتے کی ایک نسل ہے، نے پرتگالی گاؤں Conqueiros میں اپنے گھر پر ایک پارٹی کے دوران جشن منایا۔ کتے نے اسی گھر میں اپنی پوری زندگی گزاری ہے۔مالک لیونل کوسٹا نے کہا کہ 100 سے زیادہ لوگوں نے ‘انتہائی روایتی’ پرتگالی پارٹی میں شرکت کی۔ مہمانوں کو مقامی گوشت اور مچھلی پیش کی گئی۔ بوبی کے لیے بھی اضافی کھانا بنایا گیا تھا کیونکہ یہ صرف انسانی کھانا کھاتا ہے۔ سالگرہ کی تقریب میں ایک ڈانس گروپ نے بھی بوبی کے ساتھ پرفارم کیا۔کوسٹا ماضی میں کئی بوڑھے کتوں کے مالک رہے ہیں، جن میں بوبی کی والدہ گیرا بھی شامل ہیں، جو 18 سال کی عمر تک زندہ رہیں۔ کوسٹا نے کہا کہ اس نے کبھی سوچا بھی نہیں تھا کہ ان کا کوئی بھی کتا 30 سال کی عمر تک پہنچ جائے گا۔ کوسٹا نے کہا کہ ‘ہم اس طرح کے حالات کو ان کی زندگی کے ایک عام نتیجے کے طور پر دیکھتے ہیں، لیکن بوبی اپنی مثال آپ ہے۔ بوبی کی لمبی عمر میں سب سے بڑے معاون کاموں میں سے ایک ‘پرسکون، پرامن ماحول’ ہے جس میں وہ رہتا ہے۔