ایما واٹسن نے تعلیم مکمل کرنے کیلئے یونیورسٹی میں داخلہ لے لیا

راولپنڈی (نیوز ڈیسک )برطانوی اداکارہ ایما واٹسن نے 10 کے وقفے کے بعد اپنی ماسٹرز ڈگری حاصل کرنے کے لیے آکسفورڈ یونیورسٹی میں داخلہ لے لیا۔بین الاقوامی میڈیا کی رپورٹ کے مطابق، ایما واٹسن نے پہلی بار 2011ء اور 2012ء کے درمیان وزٹنگ اسٹوڈنٹ پروگرام کا حصّہ بن کر آکسفورڈ کا دورہ کیا تھا۔رپورٹ میں بتایا گیا ہے کہ اُنہوں نے اب ستمبر 2023ء سے شروع ہونے والے سیشن میں کریئٹو رائٹنگ میں ماسٹرز کی ڈگری حاصل کرنے کے لیے آکسفورڈ یونیورسٹی میں داخلہ لے لیا ہے۔یہاں اس بات کا ذکر کرنا اہم ہے کہ ایما واٹسن نے ڈریگن اسکول اور ہیڈنگٹن اسکول سے اپنے جی سی ایس ای اور اے لیولز کی تعلیم حاصل کی۔اداکارہ نے روڈ آئی لینڈ کی براؤن یونیورسٹی میں انگریزی ادب میں بی اے کرنےکے لیے بھی داخلہ لیا تھا لیکن اُنہیں اپنی فلم ’ہیری پوٹر‘ کی شوٹنگ کے لیے اپنی تعلیم کو روکنا پڑا۔اُنہوں نے اپنے ایک نئے انٹرویو میں بھی اپنی ڈگری کے بارے میں بات کی۔اُنہوں نے اداکاری سے کنارہ کشی اختیار کرنے کے اپنے فیصلے کے بارے میں وضاحت کرتے ہوئے کہا کہ’اگر میں ایمانداری سے بات کروں تو مجھے لگتا ہے کہ میں خود کو ایک پنجرے میں قید اور ناخوش محسوس کررہی تھی‘۔

You might be interested in