لانگ روٹ پرواز پر پانی کی قلت،مسافروں کو ٹوائلٹ کے لیے منرل واٹر کی بوتلوں کی فراہمی

ٹورنٹو سے کراچی آنے والی پی آئی اے کی لانگ روٹ پرواز پر پانی کی قلت کے سبب مسافروں کو ٹوائلٹ کے لیے منرل واٹر کی بوتلیں فراہم کی گئیں۔ذرائع کے مطابق ٹورنٹو سے کراچی آنے والی پی آئی اے کی پرواز پی کے 784 پر اس وقت مضحکہ خیز صورتحال پیدا ہوگئی جب ہزاروں فٹ کی بلندی پرجہاز میں قلت آب کا مسئلہ پیدا ہوا،ذرائع کے مطابق گراونڈ اسٹاف اور انجینئرز نے ٹورنٹوسے طیارے کی روانگی کے وقت پانی لوڈ نہیں کیا۔ٹورنٹو ائرپورٹ سے اڑان بھرنے کے 3 گھنٹے بعد جہاز کے ٹینکس میں پانی ختم ہوگیا،اس صورتحال کے سبب رفع حاجت کےلئے واش روم جانے والے مسافروں کو مشکلات کا سامنا رہا،غیر معمولی صورتحال کے پیش نظرجہازکے عملے نے ٹوائلٹ کے لیے مسافروں کومنرل واٹر دیا،بوائنگ 777 طیارے میں 300 سے زائد مسافر سوار تھے۔بیشترمسافروں نے پینے کا صاف پانی باتھ روم میں استعمال کیا،اسی بناءپر مسافروں کو چائے اور کافی بھی نہیں دی جا سکی، جس کی بناءپر مسافروں نے 13 گھنٹے اذیت میں گزارے۔

You might be interested in